SARADO NA ANG FIESTA CARNIVAL
Maikling sanaysay at tula ni Gregorio V. Bituin Jr.
Nitong Pebrero ko lang napansin na sarado ang Fiesta Carnival sa Cubao. Pebrero 2 ng bandang ikaanim ng gabi ay dadaan sana ako roon upang tumambay muli at magmuni-muni subalit sarado iyon. Mukhang hindi nagbukas ng buong araw.
Ngayong Pebrero 4, ikalima ng hapon, napadaan ako sa Fiesta Carnival, subalit sarado uli iyon. Nagsara na ba ang Fiesta Carnival dahil ba lugi sila? O ire-renovate ang pasyalang iyon? Subalit matagal pa ang Pasko upang i-renovate at muling mapasyalan iyon ng maraming tao.
Dahil sa pagsasara nito, tiyak wala na namang trabaho ang mga amusement staff. Kung kontraktwal sila, baka walâ silang separation pay, di tulad ng mga regular. Saan kayâ lumipat ang mga nagtitinda ng palamig, siomai, fishball, at ibá pang kakanin?
Napakalawak ng loob ng Fiesta Carnival na habang nakaupo ako noon sa isang bangkô, nakita ko ang pagdaan ng mga tao. Kaunti lang ang naglalaro. Paisa-isa. Sa limang mesa ng bilyaran, may tao sa isa o sa dalawang lamesa lang. Sa bowling na may anim na lane, minsan, sa isang lane lang may naglalaro. Minsan, may mga batang sumasakay sa sumasakay sa mga palaruan, tulad ng tsubibo. Minsan, pamilya, magkaklase. Subalit di talaga napupuno. Mabibilang mo sa daliri ang mga sumasakay sa mga sinasakyan at naglalaro. Kayâ marahil isinara muna. Di gaya noong panahon ng kapaskuhan, maraming tao. Bakasyon na kasi.
Noong nagsisimula pa lang ako bilang pultaym na tibak ay nakapaglarô pa ako bandang late 1990s sa lumang Fiesta Carnval ng rifle shooting nang ilang beses kung saan naiuuwi ko pa ang tinamaan kong target na kartong may bilog. Di ko na napansin nang magsara iyon.
Nagisnan ko na lang na ito na'y naging pamilihang Shopwise, kung saan ilang beses din kaming namili ni misis ng mga gamit. At nang maitayo ang Gateway 2 ay lumipat na roon ang Shopwise at ang pumalit muli ay ang binuhay na Fiesta Carnival.
Ilang beses din kami ni misis nagtungo sa muling bukas na Fiesta Carnival, kumakain doon, subalit hindi nakapaglarô, maliban sa booth ng kantahan, na ilang beses din kaming kumanta. Nang mamatay siya sa ospital, nalimutan ko na ang Fiesta Carnival. Subalit minsan, binabalik-balikan ko iyon at doon nagninilay. Mag-isa na lang akong nagtutungo sa Fiesta Carnival.
Madalas, pag tumambay ako ng alas-sais ng gabi, di ko na namamalayang alas-otso na pala. Napasarap sa pagninilay. Saka lang ako tatayo pag naiihi na. Malayò pa naman ang CR sa kinauupuan ko. Kayâ pagkagaling ko ng CR, oras na upang umuwi at maglakad ng higit isang kilometrong layo pauwi ng bahay. Oo, naglalakad akong pauwi dahil ang presyo ng pamasahe sa tricycle ay katumbas ng dalawang order na kanin.
Ngayon, sarado na ang Fiesta Carnival. Nawalan na ako ng tambayan sa sentro ng Cubao. Nawalan ng pahingahan pag pagod ang katawan. Nawalan ng lugar kung saan ako nakakapagsulat. Nawalan ng pasyalan kung saan nakakalikha ako ng mga tula.
Sa Facebook page ng Fiesta Carnival, sinabi naman doong temporarily closed starting February 1,2026 ang Fiesta Carnival upang bigyang daan ang renobasyon. Ibig sabihin, magbubukas din itong muli. Mababasa iyon sa kawing na https://www.facebook.com/share/17pTz4vfDY/.
O, Fiesta Carnival, naging bahagi ka na
ng aking buhay, namin ni misis, ng masa
nang mawalâ siya, nakalimutan kita
pansamantala, bagamat nakaukit ka
sa pusò, na tambayan naming mag-asawa
sana, ang Fiesta Carnival pa'y manatili
di lamang pagbibigay ng saya ang mithi
kundi nakasama sa ligaya't pighati
at may henerasyon pang naging kabahagi
sa pusò ng Pilipino'y mamamalagi
02.04.2026
